कोरोनाभाइरसः चमेराविज्ञ वैज्ञानिकले फेला पारे नयाँ प्रमाण, एसिया खतरामा

काठमाडौं। अहिले महामारी फैलाइरहेको भाइरस सार्स सिओभी–२ सँग सम्बन्धित भाइरस एसियाका कैयौं भागहरुमा चमेराहरुमा फैलिइरहेको फेला पारेका छन् । वैज्ञानिकहरुले एउटा यस्तो भाइरस पत्ता लगाएका छन् जु कोभिड–१९ महामारी फैलाउने भाइरससँग धेरै हदसम्म मिल्दो छ र यो भाइरस पूर्वी थाइल्याण्डको एक वन्यजन्तु आरक्षमा रहेका चमेराहरुमा भेटिएको छ । र, वैज्ञानिकहरुले यस्तै कोरोनाभाइरस कैयौं एसियाली क्षेत्रमा रहेका चमेराहरुमा पनि भएको पूर्वानुमान गरेका छन् ।

बीबीसीको रिपोर्टअनुसार यो भाइरस ४ हजार ८ सय वर्ग किलोमिटरको दायरामा रहेका चमेराहरुमा भेटिएको छ । यसले कोभिड–१९ कसरी उत्पन्न भयो भन्ने कुराको पनि संकेत गरेको छ । अनुसन्धानकर्ताहरुका अनुसार नमूना सीमित छन् तर वैज्ञानिकहरु सार्स सीओभी–२ सँग उच्च तहमा जेनेटिक समानता भएको कोरोनाभाइरस एसियाका कैयौं क्षेत्रहरुमा विद्यमान रहेको कुरामा विश्वस्त छन् ।

जापान, चीन थाइल्याण्ड लगायतका देशहरुमा यो भाइरस रहेको नेचर कम्युनिकेसन्स जर्नलमा प्रकाशित शोधपत्रमा वैज्ञानिकहरुले बताएका छन् । विगतका अध्ययनहरुले पनि सार्स सिओभी–२ मानिसमा आउनुभन्दा पहिले जनावरमा उत्पन्न भएको देखाएका छन् ।