देश विदेश

पत्रकारको पुरस्कारबाट टुहुरा बालबालिकालाई शैक्षिक सामग्री

शेयर गर्नुहोस्

खोटाङकी पत्रकार कृष्णकला राईले पुरस्कार स्वरुप पाएको रकमबाट टुहुरा बालबालिकालाई शैक्षिक सामग्री प्रदान गरेकी छन्। नेपाल पत्रकार महासंघ जिल्ला शाखा खोटाङको गत माघ २५ गते सम्पन्न नवौं साधारण सभामा क्रियासिल पत्रकारिता पुरस्कार स्वरुप दुई हजार पाँच सय रुपैयाँ पाएकी पत्रकार राईले बाबुआमाविहीन बनेका ओखलढुंगाको मानेभञ्ज्याङ गाउँपालिका–६ थाक्लेका रविन सार्की, संगीता सार्की र सविन सार्कीलाई झोला, कापी र डटपेन प्रदान गरेकी हुन्।

पत्रकार राईले आइएमई गरेर पठाएको सहयोग रकमबाट आफ्नो एफएम ओखलढुंगाकी स्टेशन मेनेजर बिनुमायाँ राईले झोला, कापी र डटपेन खरिद गरेर टुहुरा बालबच्चालाई हस्तान्तरण गरेकी छन्। आगलागीमा घाइते भएकी आमा निरु सार्कीको उपचारकाक्रममा मृत्यु भएको तथा केही समयपछि बेपत्ता भएका बाबुको जंगलमा कंकाल फेला परेपछि अभिभावकविहीन अवस्थामा दिनचर्या विताइरहेका अनाथ बालबालिकाको सहयोगमा पुरस्कार रकम खर्च गरिएको पत्रकार राईले बताइन्। नेपाल पत्रकार महासंघ जिल्ला शाखा खोटाङको सदस्य रहेकी राई खोटाङखबर साप्ताहिक, खोटाङटुडे डटकम लगायतका सञ्चार माध्यमममा आवद्ध छिन्।

साविकको थाक्ले–२ का रविन, संगीता र सविनको आमा निरुको आगलागीमा घाइते भएको अवस्थामा उपचारकोक्रममा सामुदायिक मिसन अस्पताल ओखलढुंगामा २०७४ साल चैत २१ गते मृत्यु भएको थियो। यस्तै, २०७६ साल मंसिर ९ गतेदेखि बेपत्ता भएका बाबु लिले सार्कीको कंकाल २०७७ साल कात्तिकमा घाँसदाउरा गएका स्थानीयले फेला पारेका थिए। तीन बालबच्चाको संरक्षण, पालनपोषण र शिक्षादिक्षाका लागि आवश्यक सहयोग गर्न मानेभञ्ज्याङ गाउँपालिकाको आग्रहमा जिल्ला प्रशासन कार्यालय ओखलढुंगाले सिफारिस दिइसकेको छ। १४ वर्षका रविन कक्षा ६ मा, १२ वर्षकी संगीता कक्षा ५ मा र १० वर्षका सविन कक्षा २ मा अध्ययनरत छन्। काँधमा घरको अभिभावकत्वको दायीत्व आएपछि पढाई छाडेका रविन आफ्नो एफएमकी स्टेसन मेनेजर राई लगायतको प्रोत्साहनमा पुनः हप्ता दिन अघिदेखि विद्यालय जान थालेका छन्।

बाबुआमा गुमाएपछि अनाथ बनेका बालबच्चाको अवस्था दयनीय बनेको छ। बालबालिकाको पालन पोषण, शिक्षादिक्षा तथा संरक्षण गर्ने कोही अभिभावक नभएकाले दीर्घकालिन आवास र शिक्षादिक्षा व्यवस्थापनको लागि मानेभञ्ज्याङ गाउँपालिकाको सिफारिसको आधारमा ओखलढुंगाका सहायक प्रमुख जिल्ला अधिकारी मनिता कार्कीले माघ १४ गते आवश्यक सहयोगका लागि सिफारिस दिइसकेका छन्।

समाचार र भिडियो हेर्न तल का लिंकहरु मा क्लिक गर्नुहोस्
श्रोत : नागरिक

शेयर गर्नुहोस्

Samim Desk

समिम मियाँ, लामो समय देखि साइप्रसका विभिन्न गतिविधि बारे अपडेट गर्दै आइरहनु भएको छ।

Leave a Reply

Your email address will not be published. Required fields are marked *