प्रशान्त महासागरको बीचमा फोहरको पोको समातेर १४ घण्टासम्म बाँचिरहे

काठमाडौं। एक व्यक्ति जहाजबाट समुद्रमा खसेपछि समुद्रमा तैरिरहेको एउटा फोहरको पोको समातेर १४ घण्टासम्म जीवित रहन सफल भए । भिदम परभर्तिलोभ सिल्भर सपोर्टर नामक जहाजका चिफ इन्जिनियर हुन् । हालै उनी आफ्नो जहाजबाट प्रशान्त महासागरमा खसेका थिए । उनी पानीमा खस्दा उनको शरीरमा लाइफ ज्याकेट थिएन ।

केही दूरीमा उनले कालो रंगको केही चिज देखे । उनलाई यी माछा मार्ने कुनै व्यक्ति भएजस्तो लाग्यो तर त्यो समुद्रमा तैरिरहेको फोहर थियो । यही पोकोले उनको जीवन १४ घण्टासम्म बचाएको छ । उनी यही पोको समातेर १४ घण्टासम्म समुद्रमा तैरिरहे । भिदोमका अनुसार त्यो फोहरको पोको केही चिजसँग जोडिएको थिएन ।

सिल्भर सपोर्टर जहाज लिथुआनियाको हो । यो जहाजले बेलायतको पिटकेर्यन बन्दरगाह र न्यूजिल्याण्डको तारुङगा बन्दरगाहबीच कार्गो ओसारपसार गर्छ । १६ फेब्रुअरीका दिन रातको पौने ४ बजेतिर भिदमलाई निद्रा र थकान महसुस भएपछि उनी खुल्लामा हावा खान आएका थिए । यही बेला शरीर तन्काउँदै गर्दा उनी समुद्रमा खसे ।

६ घण्टापछि मात्रै जहाजका कर्मचारीले भिदोम जहाजमा नभएको थाहा पाए । जहाजलाई तुरुन्तै फर्काइयो । आसपासका जहाजहरुलाई आकस्मिक सन्देश पठाइयो । ताहितीमा रहेका फ्रान्सका नौसैनिक पनि भिदोमको खोजीमा लागे । १४ घण्टापछि सिल्भर सपोर्टरका एक कर्मचारीले कसैको आवाज सुने । टाढा समुद्रबाट एक व्यक्तिले जहाजतर्फ हात हल्लाइरहेका थिए । अन्ततः थकित भिदोमको उद्धार भयो ।