४८ सयको खाना खाएर १६ लाख टिप्स दिए पछि
अमेरिकाको न्यु ह्याम्पशायरमा रहेको एउटा रेष्टुरेन्टमा खाना खानका लागि आएका एकजना ग्राहकले झण्डै ३८ डलरको बिल प्राप्त गरे ।
तर जम्मा ३७.९३ डलरको बिल चुक्ता गर्नुपर्नेमा उनले थप १६ हजार डलर टिप्ससहित कुल १६ हजार ३७ डलर ९३ सेन्ट रकम भुक्तान गरे ।
लण्डनडेरीस्थित स्टम्बल इन बार एण्ड ग्रिल नामक रेष्टुरेन्टमा आएका ती पाहुना त्यहाँ खासै आइरहने मानिस पनि होइनन् ।
तर पछिल्लोपटक आएको बेला उनले हटडग, ककटेल र तारेको अचार अर्डर गरे ।
रेष्टुरेन्टका बार्टेन्डर मिचेल म्याककडेनका अनुसार ती ग्राहक निकै रहस्यमय देखिएका थिए । उनले भुक्तान गरेको बिल हेर्दा जब बिलको रकमका अतिरिक्त १६ हजार डलर टिप्स दिएको देखियो तब उनी तीनछक परे ।
ती ग्राहकले क्रेडिट कार्डबाट बिल तथा टिप्स भुक्तानी गरेका थिए ।
उनले कार्डबाट रकम भुक्तानी गर्ने बेलामा रेष्टुरेन्टका कर्मचारीलाई तीनपटक भनेका थिए ः यो सबै रकम एकै ठाउँमा खर्च नगर्नु ।
त्यसपछि उनले भुक्तान गरेको बिल पल्टाएर हेर्दा १६ हजार डलर टिप्स दिएको देखियो ।
त्यसमा विश्वास नलागेपछि उनलाई यो के गरेको भनेर सोधियो ?
त्यसको जवाफमा उनले आफूले जानीबुझी १६ हजार टिप्स दिएको बताए ।
उनले जवाफ दिए – तपाईंहरुसँग यो रकम होस् भन्ने मेरो चाहना छ । तपाईँहरु अझै कडा मिहिनेत गर्नुहोस् ।
रेष्टुरेन्टका कर्मचारीहरुले रेष्टुरेन्ट मालिक माइक जरेलालाई बोलाएर १६ हजार डलर टिप्स दिएको कुरा सुनाए ।
त्यसदिन रेष्टुरेन्टमा काम गर्ने कर्मचारीहरु निकै भाग्यमानी रहेछन् ।
रेष्टुरेन्टको नियम अनुसार कुनै पनि दिनको टिप्स त्यसदिन कार्यरत कर्मचारीहरुबीचमा बाँडिँदो रहेछ ।
त्यसैले त्यो रकम त्यसदिन कार्यरत ८ जना कर्मचारीहरुबीच बाँडियो । केही रकम चाहिँ भोज गर्नका लागि छुट्टाइएको छ ।
एजेन्सी
