आर्मीविरुद्ध सशस्त्रको संघर्षपूर्ण जित

शसस्त्र प्रहरी बलसँग निकै प्रतिस्पर्धात्मक खेलमा ३–२ सेटले पराजित हुदैं नेपाल आर्मी क्लब टाईगर कप क्लब च्याम्पियनसिप भलिबलको महिला तर्फ उपाधि होडबाट बाहिरिएको छ । बिहीबार पोखरा रंगशालामा भएको प्रतिस्पर्धामा आर्मीले उपाधि यात्रालाई कायमै राख्न शसस्त्र प्रहरीलाई सोझो सेटमा पराजित गर्नुपर्ने थियो । तर आर्मी शसस्त्रसँग प्रतिस्पर्धात्मक सेटमा पराजित हुदैं उपाधि होडबाट बाहिरिदैं क्लब च्याम्पियनसिपबाट बिदाई लिएको छ ।  

टाईगर ग्रुप पोखराको आयोजनामा सञ्चालित प्रतियोगितामा पहिलो सेट आर्मीले आफनो पक्षमा पार्दै शसस्त्र प्रहरीमाथि दबाव सृजना गर्यो । पहिलो सेट आर्मीले २५–१८ अबस्थामा लिएको थियो । तर दोस्रो सेट भने निकै प्रतिस्पर्धात्मक बन्यो । २७–२५ को अवस्थामा आर्मीलाई पछि पार्दै शसस्त्र प्रहरीले दोस्रो सेट आफनो नाममा लेखायो । सेट १–१ को बराबरीमा ल्यायो । तेस्रो सेट पनि शसस्त्र प्रहरीले सहज जित्ने क्रममा नजिता २५–१७ मा  टुंगिएको थियो । चौथो सेटमा आईपुग्दा आर्मी फेरी खेलमा फर्कियो । चौथो सेट आर्मीले २५–२० मा लिदैं खेल रोमाञ्चक अवस्थामा पु¥यायो । निर्णायक पाँचौ सेट भने शसस्त्र प्रहरीले १५–७ ले लिदैं संघर्ष जित आत्मसात गर्यो ।

महिला तर्फकै दोस्रो खेलमा नेपाल पुलिस क्लबलाई ३–१ सेटले पराजित गर्दै न्यु डायमण्ड एकेडेमीले उपाधिको बलियो दावेदारी देखायो । निकै प्रतिस्पर्धात्मक खेलमा डायमण्डले पहिलो सेट आफनो पक्षमा २७–२५ को सेटले पार्यो । तर दोस्रो सेट भने पुलिससँग प्रतिस्पर्धात्मक रुपमा गुमायो । २९–३१ को सेटमा पुलिसलाई सुम्पिएको डायमण्डले तेस्रो र चौथो सेट लगातार लिदैं नेपाली भलिबलमा आफनो छविलाई उचाईमा पुर्यायो । तेस्रो सेट २७–२५ र चौथो सेट भने २५–१६ मा न्यु डायमण्डले जित्दै उपाधि यात्रा बलियो बनायो ।  

पुरुष तर्फको प्रतिस्पर्धामा भने विभागीय डर्बीको प्रतिस्पर्धामा त्रिभुवन आर्मी क्लबले शसस्त्र प्रहरी बलमाथि ३–० को सोझो सेटको जित निकाल्दै उपाधि होडलाई रोमाञ्चक बनाएको छ । गण्डकी प्रदेशसँग ३–१ सेटले पराजित भएको आर्मीले सशस्त्र प्रहरी बलमाथि सोझो सेटले पराजित गर्दै ३ अंक जोड्यो । शसस्त्र प्रहरीमाथि हावी भएको आर्मीले पहिलो सेट भने प्रतिस्पर्धात्मक रुपमा लियो । २५–२३ को स्थितिमा लिदैं अग्रता बनाएको आर्मीले दोस्रो सेट भने २५–२१ मा लिदैं जितको संघारमा पुग्यो । तेस्रो सेट भने २५–१८ मै लिएर आर्मीले शसस्त्र प्रहरी बलको चुनौतिलाई सहज पन्छाई छाड्यो । 

प्रकाशित: २९ माघ २०७७ १७:३५ बिहीबार